【盏鬼粤语】老泥妹、油艇仔等旧时嘅粤语称谓

肉弹

好似狄娜就系肉弹，同脱星唔一样，唔好搞错。

脱星

而陈维英就系脱星，同肉弹唔一样，又唔好搞错。

唔知陈维英系边个嘅话，请自己上网查一下。

波霸

唔系美斯，唔系Ｃ朗，更加唔系拜恩，系叶子楣。

唔知叶子楣系边个嘅话，又请自己上网查一下。

舞女〔母女〕

负责喺夜总会陪客人倾偈、饮酒、跳舞、猜枚、同上床嘅工作，喺八九十年代嗰时，年青貌美嘅舞女收入都唔错，比好多人嘅收入高好多，而年老色衰嘅就会获赠一张冷板凳嚟坐。

交际花〔胶制花〕

原意系指嗰啲善于交际应酬嘅女人，但系内含贬意，多数俾人觉得等同于高级妓女〔贵妃鸡〕。

飞仔、飞女

等同依家嘅“MK仔”、“MK女”，旧时通常都唔会单系叫飞仔、飞女，多数会尊称佢哋做“死飞仔”、“死飞女”嘅。

油脂仔、油脂妹

喺七八十年代兴起一套叫《油脂》嘅电影之后，跟风学电影角色着衫打扮嘅死飞仔、死飞女都升呢成为油脂仔、油脂妹，而油脂妹之后仲发展出“甴曱妹”、“wet妹”等嘅称呼。

老泥妹

继油脂妹、wet妹之后出现嘅另一个变种，通常系指嗰啲流连街头，周围游荡，无所事事，冇书读，冇工做，唔愿回家嘅少女。

油艇仔、油艇女．〔油瓶仔、油瓶女〕

唔系油王嘅仔女，亦唔系船王嘅仔女，系个老母带着啲仔女改嫁之后，啲仔女会就自动俾人升呢叫佢哋做油艇仔、油艇女。喺旧时，通常系会俾人“白眼”睇唔起嘅。

后底乸〔后仔乸〕

男人带着仔女另娶老婆，新老婆〔后母〕就自动俾人升呢做后底乸，无论做得几好，都一定会俾啲三姑六婆话佢刻薄老公前妻嘅仔女。

鱼蛋妹

喺八九十年代兴起嘅一种已消失嘅行业，工作地点系喺鱼蛋档，但系哩啲鱼蛋档并唔系卖鱼蛋嘅，个档口只会提供一啲卡位，请一啲未成年嘅少女〔鱼蛋妹〕陪客人倾偈，但通常啲客人都好少倾偈，只会将对手游走喺鱼蛋妹嘅身上，有啲鱼蛋妹仲会提供“达菲鸡”嘅服务，但鱼蛋档里头系唔准涉及性交易，想进一步嘅话就要同鱼蛋妹商议好之后出外面交易。

姑爷仔

同嗰啲食软饭、食拖鞋饭嘅男人有啲唔同，分别系喺食软饭、食拖鞋饭嘅男人只系靠女人做嘢嚟养自己，通常个样都系猥琐颓废，略带道友型格嘅。但系姑爷仔就唔同，佢哋系靠女人做鸡〔妓女〕嚟养自己，先要条件系高大俊朗，略带邪气仲加好，所以有啲男人平生最梦寐以求嘅系做个食软饭、食拖鞋饭嘅男人，唔系做个姑爷仔，唔好搞错。

马夫

搞清楚，马夫同姑爷仔系两样嘢嚟架，马夫嘅工作只系带啲妓女上马缆，唔使靠靓仔，姑爷仔要呃啲女仔做妓女，唔靓仔口才唔好都唔使指意做得成呀，以前啲黑社会最钟意搵啲个样靓靓仔仔既〔古惑仔〕嚟做姑爷仔。

菠萝鸡

唔好当成系菠萝炒鸡球，菠萝鸡系指啲黐饮黐食嘅人。

十三点

系指嗰啲活跃好动，傻头傻气又带啲愚昧无知嘅少女，但唔知来源是不是嚟自好多年前嘅一本叫《13点》嘅漫画。

裙脚仔

系指嗰啲好似长唔大嘅男仔。成日好似个细路仔咁，系出门或者撤娇嗰时，仲要拉住阿妈嘅裙脚边咸啊咸啊一样。喺以前，会系咁叫佢哋，但到咗依家，都仲系。

马姐〔自梳女〕

扎起马尾长辫、着住白衫黑裤、嚟自顺德嘅全能一脚踢住家工人，立志梳起唔嫁嘅自梳女，大多数都系刻苦耐劳、厨艺精湛，通常会联埋啲志同道合嘅马姐一齐凑钱买楼，退休之后就一齐住，亦即系姑婆屋。

来源：网络、羊城网