羊肉面 夏天，周浦人一碗羊肉面

赵慧珠 海上梦叠

沪语改写：顾敏

文字修正：丁迪蒙

朗读：顾敏

冬天吃羊肉温补，夏天食用则可以驱赶寒气。上海人欢喜吃白切羊肉，比方讲七宝羊肉、周浦羊肉，藏书羊肉。迭些羊肉侪各有特色，七宝羊肉“硬”，周浦羊肉“酥”，藏书羊肉是“香”。

大概是我生活勒浦东个关系，对周浦个羊肉是情有独钟呀，我欢喜伊种“皮肉酥烂软绵，香味浓郁却不腥”个口感。有人评论周浦羊肉，香而勿膻，滋味绵长，蘸酱油而食，再配点白酒、黄酒、红酒，好比是美人在怀，千金在握，实在是惬意啊！

《本草纲目》里记载：“羊肉补中益气，性甘，大热。”一般是大冷天吃个，但是，民间也流传“伏羊一碗汤”，夏天介吃可以增强体质。我看周浦人一年四季侪吃羊肉，更多个是一种生活习惯伐。特别是大热天个早浪，侬走勒周浦镇个街道浪，远远叫望过去，又高又密个香樟树下头，摆勒大大小小个折叠台子搭矮凳，坐满了男男女女、老老少少，伊拉勒悠闲个吃茶聊天。走近一看，此地个一家家羊肉面馆里已经坐满了客人，只好拿台子搬出来，撑开遮阳伞坐勒店堂间个门口头吃。当然，也有堂吃个，侬可以按照自家个需求，零切羊肉摆勒盘子里，再要一碗阳春面。而勒店堂间外头吃个客人，伊拉台子浪向摆个一包包白切羊肉或者羊杂，勿是盛勒盘子里个，而是摆了一张白纸头浪，直接从切羊肉个师傅伊搭用手捧过来个。除脱仔搿包羊肉，还有醉花生、干丝、萝卜丝咾啥个冷菜。吃羊肉个辰光要吃酒，台子浪有得白酒、黄酒或者啤酒。勿吃酒个，葛就泡杯绿茶。据说，羊肉配白酒是周浦人个传统吃法，不过，我想，白酒搭羊肉侪是热性个，搿两者结合会得形成燃烧效应伐？勿晓得羊肉拱白酒，勒周浦人个肚皮里是哪能介个融合，看来，周浦人个胸怀勿一般呀！

早茶里向，羊肉面是主角，每个客人侪有一碗热气腾腾个羊肉汤面。勒羊肉面店门口，往往有两只小摊头，一只摊头是切羊肉个男师傅，还有一只下面个女师傅。客人一般先去拿羊肉，再去等面条。羊肉通常盖勒白颜色个纱布下头，切个辰光就掀开纱布、露出一大块羊肉。晶莹剔透乳白颜色个羊肉皮下头，是浅棕色个精肉，当中呒没像棉花一样个白油，邪气新鲜清爽。师傅是按照长方形个样子切下来个，排列整齐，像是一块块长方形个饼干。而阳春面呢，香气扑鼻，汤水清澈见底，汤面浪向漂勒碧绿生青个葱花，让人个馋吐水也要流出来了。白切羊肉要有一小碟酱油做佐料，搿能吃，再能吃出羊肉个鲜味，欢喜吃甜味道个也可以蘸蘸甜面酱。

只必过是一碗羊肉面，搿顿早饭已经让人邪气眼痒了，假使再夹块羊肉，咪口老酒或者茶叶茶，剥几粒醉花生，还有几位老朋友勒一道，葛真是陶陶然呀。搿是周浦人一天生活个开场曲，好像勿吃好搿顿早茶，生活就难以开启，有了搿顿早茶末，身心愉悦，一天个生活就有了劲头。

侪讲，一方水土养一方人，饮食是一种文化。搿让我想起了四川人勒八月里吃麻辣火锅个场景，是否有得异曲同工之妙呢？周浦人围勒台子吃羊肉个辰光，勿像某些北方人欢喜闹猛、划拳，伊拉是静静叫个，笑盈盈个勒品茶、吃酒、吃面条，样子是温和个。

周浦人吃羊肉面搭兰州人吃牛肉面也有相似个地方。旧年天热，我到兰州去旅游，朋友请阿拉吃早茶。伊家面馆个位置勒兰州“中山桥”旁边，面店个厨师一律白颜色个衣裳帽子，侪是年轻人。老老大个镬子里，牛肉烧得踏踏滚。勒兰州吃拉面，搭勒上海吃个拉面勿一样，伊拉勿摆咖喱粉，侪是地道个牛肉汤水搭镬子里烧出来个牛肉做汤料。吃了美味个牛肉面，再加两只冷菜。吃好面之后，我深深叫个吸了口气，面汤好像融进了我个血液当中，浑身热气腾腾个。

吃好面去爬白塔山，爬到山顶已经是中浪向了，还勿觉着肚皮饿，我晓得，搿是牛肉拉面让我打了个底。兰州人早浪是要吃好搿碗拉面再好去读书、上班、买菜、锻炼个。兰州城里有山，年轻人吃好面还要去爬山，老人吃好面勒山里向打拳、跳舞。上海市区看勿到山，但像周浦人搿能，每日天早浪吃碗羊肉汤面，我想，伊拉个体质也会得与众勿同个伐。

掰掰手指头，我做周浦人已经快十年了。周浦是个有得一千年历史个古镇，“浦东十八镇，周浦第一镇”，此地是傅雷先生个故乡。但是夏天个早浪，空气当中羊肉飘香，也许，迭个再是我最最喜欢伊个理由之一伐。

赵慧珠，女，1957年出生于上海。大专学历。爱好写作。文章曾发表在《解放日报》“朝花时文”