有几多人只记得世纪贱男秦昇海，忘记咗当年偶像跛Co哥？

寻晚《幕后玩家》终于大结局，世纪贱男秦昇海以为自己可以操纵一切，最后都系畀人毒死，二十分钟嘅戏份结束咗自己嘅一生。

咁嘅结局，大家都唔会觉得可惜，因为大把人都想佢死，而且按照TVB惩恶扬善嘅套路，奸角最后都唔会有好下场（包括最后畀人捅死嘅顾成双），秦昇海坏事做尽，绝对唔会有好结局。

寻晚盘点2016年TVB剧集嘅时候，阿咩就讲过，秦昇海系黄宗泽演艺生涯之中，目前为止最黑暗最人渣嘅角色。

未睇嘅自己友可以点呢度��今年睇TVB，你遇过几多惊喜，踩过几多地雷？

而就喺几年前，黄宗泽出演过另一个反派角色，当时获得无数好评同大量观众追捧，嗰个就系《潜行狙击》入边嘅苏星柏（跛Co），明明系同一个演员，两个反派角色收获嘅评价完全系天壤之别。

所以，今日就嚟倾下苏星柏与秦昇海！

苏星柏

有几多人系因为跛Co哥而中意上黄宗泽？坦白讲，阿咩就系其中一个。

喺阿咩心目中，反派角色分几种，其中一种系三观扭曲、衰到贴地，基本上一见到佢嘅戏份就想打人，仲有一种系奸得非常有魅力，点都憎唔起身，甚至令愿主角死都唔想佢死。

好明显，苏星柏属于后者。

出身富人之家，因为家道中落而不得不出嚟行古惑，啱开始风生水起，就畀人暗算，跌落谷底，仲畀人打跛只脚，畀女朋友抛弃，变成一滩地底泥，任人欺压。

面对自己嗰个白痴又憨居嘅“大佬”，要示弱低头，基本上骂不还口，打不还手。

当我哋睇到后面，会发现苏星柏并唔系真系咁颓废，佢只系一直忍辱负重，暂时收敛自己嘅锋芒，等紧一个可以令佢翻身嘅机会。

喺跛Co颓废期间，有时候不经意展现自己嘅真正面目，有一场戏就系佢被激到真正发火，一个眼神就可以震慑全场。

比如，设计偷四喜嘅账簿，一边扮得又惊青又胆小，向四喜示弱，骗取信任——

转头嘅表情已经完全唔同，成个人冷静从容，胜券在握——

后来，跛Co既同Laughing哥合作，又同时归顺于辣姜同威利，喺三方之间游走，喺唔同角色之间转换，但其实佢从来冇信任过任何一方势力，只系想借用三方势力帮助自己上位。

同三方势力交锋都可以做到游刃有余，从容不迫，可见，跛Co唔止有野心，仲有可以实现自己野心嘅才智同头脑，单凭呢点，佢嘅段位就比一般反派要高好多。

既然作为反派，跛Co身上就肯定会有反派嘅标志性特质：为求目的不择手段、心狠手辣、贪婪残暴。

放火之后，可以面带笑容、若无其事咁影相

设计报复当年打跛自己嘅威利，以牙还牙将佢只脚碾断嘅时候，狠毒嘅眼神令人难忘

但跛Co身上又有其他黑社会反派冇嘅特质，由于出身良好又受过教育，跛Co身上总会有一种文人特有嘅儒雅同格调，所以被誉为有史以来港产警匪剧之中档次最高、最有格调嘅黑社会大佬，令呢个角色魅力大增。

当然，最令跛Co受女性观众欢迎嘅一点，莫过于佢对姚可可嘅一往情深同矢志不渝。一个聪明有脑、霸道情深嘅黑社会大佬，边个女人可以拒绝？

毫无疑问，跛Co系黄宗泽塑造得最成功最精彩嘅角色，亦都系阿咩心目中，黄宗泽演技嘅巅峰，入边有一幕戏非常难忘——

有一场戏，跛Co畀威利侮辱，被迫舔鞋底，一开始畀人冤枉，畀“大佬”刮嘅时候，跛Co首先系惊愕同呆滞。

跟住转为愤怒同不忿，表情变得狼毒，但系嗰时嘅佢，畀人踩到上心口都只可以哑忍，所以唯有嘴唇微微郁咗几下，但忍住唔出声。

舔完鞋底，仲要畀人问好唔好味，跛Co最后一声嘅咆哮回答令人震撼，此时佢受尽屈辱，眼神充满悲愤同仇恨。

因为呢次屈辱，佢先下定决心，争权上位，东山再起。呢下振聋发聩嘅咆哮，正正预示咗跛Co正式告别落魄时期，开始苏醒同崛起。

整个过程嘅情绪积聚、过渡、到最终爆发，黄宗泽都处理得非常好，毫不做作，令观众真系感受到跛Co嘅心路变化。

成部《潜行狙击》，黄宗泽将跛Co嘅锋芒初露、落魄颓废、复仇崛起、奋斗上位、落败身亡五个阶段都演得非常好，难怪有人感叹，跛Co就系黄宗泽嘅另一个灵魂。

秦昇海

作为一个男主角， 秦昇海都算特别，因为从中段开始，佢嘅作用同行为简直等同于一个世纪大反派，越到后边，越乞人憎，个个观众都想佢死（阿咩身边追剧嘅人基本上都系咁谂）。

其实，秦昇海同苏星柏有唔少类似嘅地方，一样都系受过良好教育，聪明醒目，识得睇人眉头眼额，城府极深，心计又重，见到机会就上位，做起大事阴险毒辣，不留情面。

最重要一点，两个人都好忍得，好识掩饰自己！

但系点解跛Co就咁受欢迎，秦昇海就畀人闹到扑街？究其原因，秦昇海输畀跛Co嘅不外乎以下几点：

1

虚伪到令人发指

作为一个公关，秦昇海对待客户表里不一其实都系正常，但系秦昇海对自己嘅家人同朋友，都一样咁表里不一。

明明自己老婆系个好到加零一嘅贤妻良母，竟然都要出去包二奶？

呢头同屋企人参加生日会，仲系一副谦和温柔嘅好先生形象，道别之后，即刻露出唔耐烦嘅表情，将蛋糕掟去垃圾桶。

利用完其他人之后，就毫不留情咁踢开佢哋，仲要继续喺自己朋友面前扮出一副假仁假义嘅样。

▲真正嘅皮笑肉不笑

秦昇海表面上系一位面面俱到嘅好先生，实际上佢系残酷不仁、贪婪薄情嘅伪君子，仲要呃晒身边所有人。而跛Co再猜忌其他人，都起码对姚可可有真情，对爆登讲义气。

2

毫无人性同底线

跛Co再心狠手辣，都仲有少少良心同底线，唔会祸害老人家。

而秦昇海自从阿妈死咗之后，就开始泯灭人性，首先最令观众气愤嘅就系伤害Carmen：喺飞机上嘅对话，同埋后来故意喺咖啡厅激Carmen两段戏，简直激到观众当场拍枱。

害死阿Ted之后，唔系愧疚，而系觉得唔抵，因为阿Ted嘅死阻断咗佢入复生嘅路。

更加唔好提，后来兄弟反面，迫害自己嘅兄弟同家人，越睇后边越觉得，秦昇海没有最渣，只有更渣。

秦昇海系一个典型嘅利己主义者，除咗自己，从来冇真正在乎过其他人，一个冇弱点冇短板嘅反派，往往系最恐怖、最令人心寒。

3

冇做坏人嘅合理理由

任何一个反派角色嘅黑化，都应该有一个合理嘅理由，好似跛Co咁，佢家道中落，畀人陷害，仲要被迫舔人鞋底，加上佢系一个古惑仔，选择上位做大佬都系合理嘅。

再比如《致命复活》嘅韦逸昇，畀人害到囚禁孤岛十年，家庭事业全部冇晒，仲被认定为死亡人口，佢黑化报复害佢嘅人都系合理。

但系秦昇海黑化到冇人性嘅理由系咩？

做记者报道真相畀人打？畀人一再打压，觉得心有不甘？定系畀啲高傲嘅有钱人侮辱，觉得不忿？

以上理由都唔够充分，唔可以令观众信服，因为秦昇海就算再多呢啲挫折，佢本身系家庭美满、事业顺利、朋友和睦，比起好多人都幸福，点解仲要一手一脚破坏自己所有嘅幸福，去争权逐利？

或者真系秦昇海呢个角色本身嘅设定，对名利同地位非常执着，不惜牺牲一切都要追求更高嘅利益，但系一个咁自私自利嘅角色，点会有观众中意？

唔通编剧只系顾住写秦昇海有几衰，冇顾及到解释点解佢要变到咁衰？

4

全世界就得你一个咁衰

《潜行狙击》入边，好多角色嘅毒辣、无情程度，同跛Co都差唔多，就算系主角Laughing都成日踩界，个个人都咁狠毒，唔系你死就系我亡，所以跛Co嘅以暴制暴、以牙还牙就显得合理。

而《幕后玩家》里面，狠毒嘅只有秦昇海。

顾成双、顾成勋、Philip做嘅衰嘢都比唔上秦昇海一个人，而且佢地起码都有底线，顾成双会为阿Ted报仇，顾成勋在乎自己阿妈，其他角色更加都系好人。

就秦昇海一个大衰人，观众唔讨厌你，讨厌边个……

秦昇海同苏星柏最大嘅区别在于：

苏星柏：我知我做嘅事系坏事，但系我就系要做，冇人可以阻止我。

秦昇海：你哋觉得我做嘅坏事咩？但系我嘅选择系正常啊，系情有可原啊，做人都系咁噶啦！

喺演绎秦昇海呢个角色嘅时候，黄宗泽经常展现佢嘅两种状态——

一种系喺人前，扮出一副善良温厚、老实无辜嘅好好先生样，令人觉得佢真系一个好人，呢个系秦昇海畀其他人睇嘅皮囊。

▲就算不怀好意，都要一副苦口婆心嘅样

另一种系喺人后，佢阴沉自私、冷酷无情嘅真正面目，每一个表情都充满对他人嘅怨恨，对权力利益嘅极度渴望。

当时喺接呢个角色嘅时候，黄宗泽本人都觉得疑惑，追问监制呢个角色有冇必要写到咁衰吗？

监制回复佢：“你唔会以为世界上冇呢种人啊嘛？只系大家因为道德观而唔敢去想象，但系佢的确存在。”

有啲角色你未必会中意，可能就系因为佢反映你最唔想面对嘅现实。

可能你好似我咁，未必中意秦昇海，但系就系情不自禁咁追完《幕后玩家》，因为佢的确系一部值得睇嘅港剧。（虽然我真系想讲，结局好烂！！！TVB又一部烂尾之作！）

最后，都系嗰句，本文仅代表个人意见！祝大家周末愉快！

关于秦昇海同苏星柏呢两个角色，

各位自己友有咩睇法？

系中意到爆，定系讨厌到死？

留言同大家分享下！

本文看点由羊城网原创

部分图片素材来自黄宗泽贴吧

相关阅读：

睇完《幕后玩家》段片之后，先知自己粤语讲得咁渣！

今日背熟呢条微信，听日你就系下一个TVB编剧！

TVB今年最后嘅台庆剧《致命复活》今日开播，郭晋安再次黑化？

新一代金句王张继聪，边讲金句边传授“劈酒绝技”！