【保迷必看】当你体验过保时捷911 Turbo S的时候，GT3也是浮云！

▲「最牛逼的华人车商」

　　每天为您提供以下精彩汽车内容 　　热点 　　视频 　　资讯 　　测评 　　其他

（文章转自：Menclub）

大约十年前，我试揸过997 GT3前期同后期型之后，我都问自己一个问题：「保时捷会唔会有一日停止发展911 Turbo？」

因为，997型911 GT3实在太正喇！

典型嘅反驳会系咁：「拿！GT3呢，始终系自然吸气引擎；911 Turbo，Twin Turbo引擎嘛，啲力嚟得癫好多、丧好多。再者，911 Turbo内栊grand好多，避震又舒服啲，所以呢，两款车系唔同market㗎。」

2015年底公布，2016年起发售嘅991 facelift版，又被称为991.2，除左GT3以外，其馀都「Turbo化」，例如Carrera、Carrera S同Carrera GTS，都已改配3公升水平对向六汽缸Twin Turbo引擎。

「纯粹只想有部配Twin Turbo引擎嘅保时捷，真系唔使买911 Turbo。」

讲真，呢一日预左会出现，911 Turbo喺呢个处境，或多或少都被Carrera、Carrera S或Carrera GTS「刀光」，冇左以前高高在上，「Twin Turbo引擎只有我同GT2先至有」嘅霸气。

911 Turbo喺1974年公布，1975年正式投产。可以话，喺930、964年代，911 Turbo绝对系Superstar，对60后、70后嘅车迷嚟讲，911 Turbo始终有佢魅力，心里仍俾一个好高嘅位置佢，又或者觉得拥有过911 Turbo系「玩车人生」嘅一个重要里程。

911 Turbo 3.0(1975)

911 Turbo S 3.3(1992)

911 Turbo S 3.6(1998)

今次试嘅呢部911 Turbo S，配3.8公升水平对向6汽缸Twin Turbo引擎，最大马力580匹/6750rpm，峰值扭力76.5kgm/2250rpm-4000rpm（非overboost状态71.4kgm），0至100km/h加速为2.9秒，极速330km/h。

刻意由Normal模式开始试，好轻鬆，喺告士打道一带至西隧西环入口前，波箱好快已跳上5波、6波，悬挂只有两段设校模式，Normal同Sport，以配搭245/35 ZR20同305/30 ZR20嘅轮胎嚟讲，缓震表现好好，整体感觉似坐喺德国中型豪华房车，好舒服，系可以日日用嘅代步车。唯一要留意系：911 Turbo S嘅wide body计，令佢车尾真系几阔，过线又好，泊位也好，都要预鬆少少位，望清楚。当要进出一啲商厦停车场，缓衝位唔多嘅话，的确有压力。

我特登跳过Sport模式，直接上Sport Plus，即时成部车「硬晒」，悬挂自动调到Sport，无论喺任何车迷之下，PDK波箱都派到一个最合适嘅波档，拉高把引擎声，

「搂」你踩大油加速，你把心一横右脚大力笃落油门，嗰种强劲加速感，就好似企喺地铁车门，后面突然有十几廿人将你撞入车箱一样，嗰一刻你深知顶唔住呢班友，引擎推力绝对系排山倒海之势，「哗！好劲呀！我死喇！冇㗎喇！」

如果香港高速公路，极速上限系220km/h，多一倍就正！

唔计930或964年代，由993数起到今次991.2嘅Turbo S，「911 Turbo」真系大部左好多，老实讲，我觉得997已经到我个人标淮嘅上限。但揸落之后，发现而家4.5米嘅车长，1.88米阔嘅车身又唔算好大部，唔论尽，比起996同997两代嘅911 Turbo，991.2 Turbo S嘅四驱抓著力丰富之馀，前轮唔会喺入弯早段有太强烈嘅「抗拒」，车头仲算系好肯「啜」入弯心，喺好似荃锦公路嘅山路，即使细幅度嘅微细扭軚，车头好快就畀到实时反应。

我锺意咁样嘅调校，唔想再好似997 Carrera 4S嗰类「行路轨」嘅感觉，循迹性强，但流于生硬，估唔到今次试揸嘅911 Turbo S喺弯路都可以有幼细同灵巧。

991.2喺上落嘅慢弯同中弯，整体嚟讲几生猛，同时又好稳定，呢一代嘅911，猛力加速时嘅车头上仰情况已变得好轻微，喺大多数乾爽或微雨情况下，后轮都非常之咬的，除非你刻意要划破后轮极限，否则佢系一部好易揸得快，令你觉得好爽兼好兴奋嘅大马力Twin Turbo跑车。

一面倒令大多数人更易驾驭嘅缺点，就系冇左993或964年代911 Turbo嗰种，令你喺弯路有战战兢兢、又怕又好玩嘅大马力RR车风味。

今次试车时间唔算长，如果有得落track，又或者喺人烟稀少嘅地带揸快啲，相信可以对佢PTV Plus同后轮转向（Rear axle steering）有多啲，同深入啲嘅体会，但初步觉得，后轮同车尾喺连续S弯总喺有一股无形力量介入，令你产生一种感觉：背脊同后轮嘅距离近左，从而觉得成部车好nimble。

911 Turbo S有几多缺点？有！车厢隔音太好，加上Turbo引擎声唔响亮清晰，如果想又快又好靓的话，请移玉步到隔嚟舖911 GT3。另外，我嫌今代911 Turbo嘅外形唔够辣，斯文左啲，如果下一代911仲有911 Turbo或911 Turbo S，保时捷一定要为呢位「Turbo开山老祖」加辣，甚至系劲辣呀，唔该！